ភ្នំពេញ៖ រដ្ឋមន្ត្រីក្រសួងមហាផ្ទៃ លោក ស ខេង បង្ហាញការព្រួយបារម្ភពីបញ្ហាដែលប្រជាពលរដ្ឋមួយចំនួនរស់នៅតាមតំបន់ព្រំដែន នៅតែបន្តជួលដីទៅឲ្យពលរដ្ឋវៀតណាមអាស្រ័យផល ដែលអាចបង្កជាទំនាស់ដីធ្លីតាមព្រំដែននៅពេលអនាគត។
ថ្លែងក្នុងពិធីបិទសន្និបាតបូកសរុបលទ្ធផលការងារឆ្នាំ២០២១ របស់រដ្ឋបាលខេត្តព្រៃវែង នៅថ្ងៃទី២២ ខែមីនា ឆ្នាំ២០២២នេះ រដ្ឋមន្ត្រីក្រសួងមហាផ្ទៃលោក ស ខេង បានលើកឡើងថា ពលរដ្ឋខ្មែរនៅតាមតំបន់ព្រំដែនវៀតណាម ច្រើនតែជួលដី ជាពិសេសដីស្រែចម្ការឲ្យទៅជនជាតិមួយនេះដើម្បីអាស្រ័យផល ព្រោះវាមានភាពងាយស្រួលដោយសារបានតម្លៃពីការជួលនោះដោយពុំបានគិតដល់ផលប៉ះពាល់នៅពេលខាងមុខ។
លោកបន្តថា៖ «អ៊ីចឹងហើយមិនត្រូវទេ អត់មានសិទ្ធិទេ! អាសិទ្ធិជួលហ្នឹង ខ្ញុំមិនដឹងអ្នកណាសម្រេចទេ ប៉ុន្តែសុំសិក្សាឱ្យបានមែនទែន សិទ្ធិជួលអ៊ីចឹងៗអត់ឱ្យជួលទេ។ អាហ្នឹងអត់បានទេ ជួលយូរៗទៅ គាត់ថាអាហ្នឹងដីគាត់ (វៀតណាម) មកធ្វើយូរហើយនេះជាបញ្ហា»។
លោកណែនាំទៅអាជ្ញាធរតាមបណ្ដោយព្រំដែនកម្ពុជា-វៀតណាម ប្រាប់ពលរដ្ឋខ្មែរឱ្យឈប់ជួលដីទៅពលរដ្ឋវៀតណាមអាស្រ័យផលបន្តទៀត ដោយលោកបារម្ភថានឹងអាចបង្កជាទំនាស់ដីធ្លីដែលមានភាពស្មុគស្មាញនៅតាមព្រំដែន។
លោកបន្តថា ការគ្រប់គ្រងសន្តិសុខនេះជាផ្នែកមួយសំខាន់ ដើម្បីទប់ស្កាត់ការលួចឆ្លងដែននិងការរត់ពន្ធខុសច្បាប់ចូលកម្ពុជា ជាពិសេសកងយោធពលខេរភូមិន្ទ និងកងកម្លាំងនគរបាលទាំងអស់ត្រូវរួមគ្នា ដើម្បីការពារបូរណភាពទឹកដីតាមព្រំដែនបន្តទៀត។
គួរឱ្យដឹងថា កាលពីខែវិច្ឆិកា ឆ្នាំ២០១៥ រដ្ឋាភិបាលបានចេញសារាចរណែនាំមួយ ហាមពលរដ្ឋខ្មែរដែលរស់នៅជាប់ព្រំដែនទាំងអស់ត្រូវបញ្ឈប់ការជួលដីទៅឱ្យប្រទេសជិតខាង រួមមាន ថៃ វៀតណាម និងឡាវ៕
